Bettina Vital und Viola Cadruvi
Foto: Mayk Wendt
Bettina Vital, Nascha l’onn 1981 en Engiadina Bassa e passenta l’uffanza ad Ardez cun influenzas da Tschin e da Sent. Studegia romanistica comperativa, rumantsch e linguistica tudestga a l’Universitad da Turitg (UZH) e Barcelona. Coordinescha las translaziuns rumantschas en la Chanzlia federala (fin 2015), lavura per Radio Bern Rabe e fa suttitels per SRF. Translatescha, lectorescha e correctorescha actualmain a moda independenta. Sper la redacziun dal Chalender Ladin, participescha ella regularmain al Tavulin litterar e scriva per la retscha «Litteratura ed amur» da Radioetelevisiun Svizra Rumantscha (RTR). Fa part dal gremi editorial da la Chasa Editura Rumantscha, co-curatescha il festival «LitteraturA Nairs» ed instruescha vallader a l’UZH. Ella viva cun sia famiglia a Uetikon am See.
Foto: Raphael Hofstetter
Viola Cadruvi, naschida 1992, è creschida si giu la Bassa, ha dentant adina discurrì rumantsch. Ella ha studegià germanistica, istorgia e rumantsch ed ha fatg il diplom da scolasta gimnasiala. Mintgatant lavura ella sco assistenta a l’Universitad da Turitg, mintgatant sco scolasta u columnista u vi da sia dissertaziun, ma bunamain adina scriva ella. Ella scriva istorgias curtas, lungas, columnas, anecdotas e sgnoccas per sasezza e per auters. 2014 ha ella als Dis da Litteratura a Domat gudagnà il Premi Term bel per sia istorgia curta «La dunna da Benedetg Albin» e 2018 il premi dal public per «La curridra». Ella ha publitgà intginas istorgias curtas en rimnadas e magazins e sa sprova uss vida insatge pli lung.
Projekt
Durant Double ha Viola Cadruvi lavurà ensemen cun la mentura Bettina Vital vi da l’istorgia da Benedetg Deplazes: Benedetg Deplazes ha 81 onns e viva dapi in mais e mez en Chasa s. Valentin. El leva la damaun, sa dispita cun tgirunzas e cunabitants, baiva café e fima sias marlboros. Fin che sia stgatletta da cigarettas d’argient svanescha in di. Forsa l’ha Grittli ord la stanza dasperas engulà? U ina da las tgirunzas? U forsa Gieri Giusep che pensa che Benedetg fetschia bels egls a sia dunna? Benedetg sto chattar ora tgi ch'igl è stà e sa metta sin in viadi atras l’asil, atras il vitg ed uschia plaun plaunet atras sia vita vers in futur che po esser magari bain tschert.