Romana Ganzoni e Janic Maskos
Foto: Anna Positano
Romana Ganzoni, Nada suna a Scuol in avrigl da l’on 1967 sco figlia d’üna mamma da Zizers ed ün bap dal Partens, tuots duos cun üna ferma identità dal Grischun tudais-ch e duos dialects differents sviluppats e richs. La mamma faiva rimas sco ch’ella cuschinaiva, üna roba chi s’inclegia da sai, il bap invezza: ün grond raquintader gualser. Prosa e lirica da minchadi d’eiran omnispreschaintas. Lönch nu’m rendaiva quint cha quai nun es per tuots il punct da partenza in üna vita cun bleras linguas e creaziun litterara, ma eir per la vita sco part d’üna minorità. A scriver (per vallader) n’haja imprais pro meis prüm magister. Ün pêr ons plü tard es gnü pro il „bun“ tudais-ch, tras marrida eir il puter. Eu n’ha cumanzà a publichar texts litterars pür cun 46 ons. L’on 2017 es cumparü meis prüm cudesch tudais-ch, 2020 meis prüm cudesch rumantsch cun prosa cuorta e poesias. L’ultim roman ha il titel „Magdalenas Sünde“ (Diogenes, 2022).
Foto: Mayk Wendt
Janic Maskos, 2003 es nat e creschü sü a Scuol. El stübgia rumantsch e biodiversità a Turich. Sperapro scriva’l da tuottas sorts – tanter oter eir “Impuls” pel Radio Rumantsch. Seis texts, raquints cuorts, insais e singulas poesias sun gnüts publichats illa gazetta ed in antologias.
Progetto
Chi s’esa? LA dumonda d’ün roman da svilup. « Chi chi’s es », « chi chi’s
voul dvantar » o perfin « che chi’s es » sun dumondas chi occupan a qualchün. Che
ch’ün’istorgia dvainta, quai es üna dumonda chiˋm confuond’a mai. Pel mumaint nu
saj’amo in che direcziun ch’ella giarà, ma eu sun sgür e tschert cha‘l coaching cun Romana Ganzoni sarà ün aventüra.