Romana Ganzoni und Flurina Badel
Foto: Yvonne Bollhalder
Romana Ganzoni: Nada suna a Scuol in avrigl da l’on 1967 sco figlia d’üna mamma da Zizers ed ün bap dal Partens, tuots duos cun üna ferma identità dal Grischun tudais-ch e duos dialects differents fich sviluppats e richs. La mamma faiva rimas sco ch’ella cuschinaiva, i d’eira üna roba chi s’inclegia da sai, il bap invezza: ün grond raquintader gualser. Prosa e lirica da minchadi d’eiran omnispreschaintas. Lönch nu’m rendaiva quint cha quai nun es per tuots il punct da partenza in üna vita cun bleras linguas e creaziun litterara, ma eir per la vita sco part d’üna minorità. A scriver (per rumantsch vallader) n’haja imprais pro meis prüm magister. Ün pêr ons plü tard es gnü pro il „bun“ tudais-ch e la litteratura classica tudais-cha, tras la marrida eir amo il puter. Eu n’ha cumanzà a publichar texts litterars pür cun 46 ons. L’on 2017 es cumparü meis prüm cudesch in tudais-ch: Granada Grischun, Rotpunktverlag, Turich. Poesias rumantschas as chatta i’l Chalender ladin dal 2016 e 2017 e pro’l Radio rumantsch.
Foto: Jérémie Sarbach
Flurina Badel (*1983 a Lavin) viva a Guarda. Davo üna prüma scolaziun da schurnalissem e communicaziun publica, ha ella lavurà tanter oter sco moderatura e cineasta libra. Dal 2015 ha Flurina Badel absolt il Master of Fine Arts a l’institut d’art da la HGK FHNW a Basilea e dal 2017/2018 es ella statta studenta ospitanta a l’institut per art litterara da l’Università d’art applichada a Vienna. Daspö il 2014 es sia professiun principala la lavur artistica i’l duo Badel/Sarbach cun exposiziuns sün tuot il muond (badelsarbach.com) Implü es Flurina Badel la redactura respunsabla per l’emischiun „Impuls“ da Radiotelevisiun Svizra Rumantscha ed ella es co-curatura dal program litterar da LitteraturA Nairs. Flurina Badel publichescha da temp in temp eir agens texts litterars, ch’ella scriva biling, vallader e tudais-ch. Dal 2018 ha ella survgni il premi OpenNet dals Dis da litteratura a Soloturn.
Projekt
Dürant double ha lavurà Flurina Badel cun la mentura Romana Ganzoni vi da plüs progets. Ellas han lectorà las poesias per il tom «tinnitus tropic» (editionmevinapuorger, 2019), plünavant lavurà vi dal proget da roman vallader cul titel da lavur «Ballöm» e vi dal manuscript per üna selecziun da miniaturas/prosa cuorta cul titel da lavur «dar e tour fa bun cour». La lavur vi dals texts es statta precis uschè importanta sco il barat sur dal muond da la littertura, saja quai per exaimpel in vista a prelecziuns o collavuraziuns cun chasas edituras.